2012 оны 12 сарын 22-ны өдрийн Засгийн газрын хуралдааны мэдээллээс

ИХ ӨРИЙГ БҮРМӨСӨН БАРАГДУУЛЛАА

2010 оны 12 дугаар сарын 14-ний өдөр ОХУ-ын Москва хотноо гарын үсэг зурсан “Оросын Холбооны Улсын өмнө Монгол Улсын хүлээх санхүүгийн үүргийг зохицуулах тухай Монгол Улсын Засгийн газар, Оросын Холбооны Улсын Засгийн газар хоорондын Хэлэлцээр”-ийг Засгийн газрын 2010 оны 12 дугаар сарын 22-ны өдрийн хуралдаанаар баталлаа.

Хэлэлцээрийг хүчин төгөлдөр болгоход шаардлагатай дотоодын журмыг Монголын тал хангасан тухай Оросын талд мэдэгдэхийг Гадаад харилцааны сайд Г.Занданшатарт даалгав.

Хэлэлцээрийн дагуу ОХУ-ын “Хөгжил, гадаад эдийн засгийн үйл ажиллагааны банк” улсын корпораци болон Монголбанкны хооронд “Тооцооны бүртгэл, хөтлөлтийн техникийн журмын тухай Хэлэлцээр”-ийг заагдсан хугацаанд нь байгуулахыг Монголбанкны Ерөнхийлөгч Л.Пүрэвдоржид зөвлөсөн байна. Монгол-Оросын хамтарсан “Монголросцветмет” нэгдлийн дүрмийн сангийн Монголын талын хувь хөрөнгийг бүрдүүлэхээр ЗСБНХУ-аас /хуучин нэрээр/ авсан зээлийн үлдэгдэл оросын талын тооцоогоор 2010 оны байдлаар 163.7 сая шилжих рубль болсон байсан юм.

Мөн Монгол Улс, ОХУ-ын хооронд бараа солилцох үйл ажиллагаанд зориулан нээсэн дансны үлдэгдэл 10.4 сая клирингийн ам. доллар болсон ч энэ өрийг талууд эцэслэн зохицуулаагүй байлаа. Дээрх хоёр төрлийн өрийг зохицуулахаар талууд удаа дараа уулзалт, хэлэлцээ хийсний дүнд Монгол Улсын Ерөнхий сайд С.Батболдын 2010 оны 12 дугаар сарын 13-16-ны өдрүүдэд ОХУ-д хийсэн албан ёсны айлчлалын үеэр хоёр улсын Сангийн сайд Засгийн газар хоорондын Хэлэлцээрт гарын үсэг зурж баталгаажуулсан юм.

Хэлэлцээрт зааснаар манай улсын өр болох 174.2 сая ам. доллараас 97.8 хувийг хүчингүй болгож, үлдэх 3.8 сая ам долларыг манай тал Хэлэлцээр хүчин төгөлдөр болсноос эхлэн 30 хоногийн дотор нэг удаагийн мөнгөн төлбөрөөр Оросын талд төлснөөр их өрийн асуудалд цэг тавих юм. Энэ мөнгийг 2011 оны улсын төсөвт тусгасан байна гэж Засгийн газрын Хэвлэл, мэдээллийн албанаас мэдээллээ.

ХҮН ХУДАЛДААЛАХЫН ЭСРЭГ ХАМТРАН ТЭМЦЭНЭ

“Хүн худалдаалахтай тэмцэх асуудлаар хамтран ажиллах тухай Монгол Улсын Засгийн газар, БНХАУ-ын Макаогийн Засаг захиргааны онцгой бүсийн Засгийн газар хоорондын хэлэлцээр”-ийг Засгийн газрын хуралдаанаар хэлэлцэн баталлаа.

Хүн худалдаалах хэрэг нь ихэвчлэн хил дамнасан, өндөр зохион байгуулалттай, нууцлагдмал учир манай улсын хууль хяналтын болон бусад холбогдох байгууллага дангаараа илрүүлж, мөрдөн шалгах, хохирогчдыг хамгаалж, эх оронд нь буцаах боломж байхгүй. Иймээс монгол эмэгтэйчүүдийг худалдаалдаг томоохон төв болоод байгаа Макаод буй монголчуудынхаа эрх ашгийг хамгаалахад энэ хэлэлцээр чухал хувь нэмэр оруулах юм.

Хэлэлцээр байгуулснаар хоёр талын хооронд хүн, ялангуяа эмэгтэйчүүд, хүүхдүүдийг худалдахаас урьдчилан сэргийлэх, таслан зогсоох, энэ гэмт хэргийн хохирогчдын эрх ашгийг хамгаалах, эх оронд нь буцаах, буцаах хүртэл саатуулах байранд саатуулахгүй байх, хүнлэг ёсоор харьцах, эргэн нийгэмшүүлэх, гэмт хэрэгтнүүдийг олж тогтоон хариуцлага хүлээлгэх, хэргийн улмаас хохирсон эд хөрөнгө, эрүүл мэнд, оюун санааны хохирлыг барагдуулах зэрэг чиглэлээр хамтран ажиллах эрх зүйн үндэс бүрдэж байна.

ТОВЧХОН

• Монгол Улсын Ерөнхийлөгч Ц.Элбэгдоржийн 2010 оны 11 дүгээр сарын 15-19-ний өдрүүдэд Япон Улсад хийсэн төрийн айлчлалын дүнг хэлэлцээд Үндэсний аюулгүй байдлын зөвлөлд оруулах боллоо.

• Дипломат, албан паспорт эзэмшигчдийг визийн шаардлагаас харилцан чөлөөлөх тухай Монгол Улсын Засгийн газар, Бүгд Найрамдах Болгар Улсын Засгийн газар, Бүгд Найрамдах Кипр Улсын Засгийн газар хоорондын хэлэлцээр байгуулах нь зүйтэй гэж үзлээ.

• НҮБ-ын Ази, Номхон далайн эдийн засаг, нийгмийн комисстой хамтран “Ази, Номхон далайн бүсийн далайд гарцгүй хөгжиж байгаа орнуудад тулгарч байгаа хөгжлийн саад бэрхшээл” сэдэвт Өндөр түвшний бодлогын зөвлөлдөх уулзалтыг 2011 оны 4 дүгээр сарын 12-14-нд Улаанбаатар хотноо зохион байгуулах болов.