Гадаад харилцааны сайд Г.Занданшатар Элчин сайдуудыг хүлээн авч уулзаж байна

Шинээр томилогдоод удаагүй байгаа УИХ, Засгийн газрын гишүүн, Гадаад харилцааны сайд Г.Занданшатар Монголд суугаа Онц бөгөөд Бүрэн эрхт Элчин сайдуудыг хүлээн авч уулзаж байна.
БНФУ-аас Монгол Улсад суугаа Онц бөгөөд Бүрэн эрхт Элчин сайд Жан-Поль Дюмоныг энэ сарын 23-нд өөрийн нь хүсэлтээр хүлээн авч уулзаж, хоёр орны харилцаа, хамтын ажиллагааны зарим асуудлаар санал солилцлоо.
Мөн Гадаад харилцааны сайд Бүгд Найрамдах Чех Улсаас манай улсад суугаа Онц бөгөөд бүрэн Эрхт Элчин сайд Вацлав Йилекийг хүлээн авч уулзав. Чехэд Монголын 13 мянга орчим иргэн оршин сууж байна. Хоёр орны харилцаа, хоёр талын болон олон талт хамтын ажиллагааны хүрээнд амжилттай хөгжиж байгааг тэмдэглээд ирэх жил хоёр орны хооронд дипломат харилцаа тогтоосны 60 жилийн ой тохиох ба хоёр тал энэхүү арга хэмжээг ёслол төгөлдөр тэмдэглэхээ хоёр тал илэрхийллээ. Монгол, Чехийн худалдааны нийт эргэлт 2008 оны 12 сарын байдлаар 16,9 сая ам.доллар байсан. БНЧУ-ын буцалтгүй тусламжаар нийт 15,5 сая ам.долларын өртөг бүхий 20 төсөл хэрэгжиж байна.
Гадаад харилцааны сайд мөн өдөр Люксембургийн Их Гүнт улсаас Монгол улсад суугаа Онц бөгөөд Бүрэн эрхт Элчин сайд Карло Криегерийг хүлээн авч уулзан, хоёр орны харилцаа, хамтын ажиллагааны зарим асуудлаар санал солилцлоо. Люксембургийн тусламжаар хэрэгжиж байгаа “Зүрх судасны оношлогооны төв”-ийн хоёрдугаар шатны төслүүд амжилттай хэрэгжиж байна. Төслийн хүрээнд нийт зургаан аймагт эхографикийн төв байгуулсан бөгөөд Улаанбаатар хотод Шастины төв дээр интернэтээр холбогдож, мэдээлэл хүлээн авч оношлох, сургалт явагдаж байгаа. Манай улсын хүн амын эрүүл мэндийн чиглэлээр хийгдэж байгаа олон арван төсөл амжилттай хэрэгжиж байгааг Гадаад харилцааны сайд онцоллоо.
Монгол Улсын Гадаад харилцааны сайд Г.Занданшатар Их Британи, Умард Ирландын Нэгдсэн Вант Улсаас манай улсад суугаа Онц бөгөөд бүрэн Эрхт Элчин сайд Билл Диксоныг энэ сарын 24-ний өдөр хүлээн авч уулзав.
Хэдхэн хоногийн дараа Лондон хотноо болох Европ-Монголын хөрөнгө оруулагчдын чуулга уулзалт нь Монгол Улсыг Европ төдийгүй дэлхийд таниулах чухал үйл явдал болно гэдэгт хоёр тал итгэлтэй байгаагаа илэрхийлэв. Монгол улс 2008 онд самнасан ноолуур, алт зэрэг нийт 165,8 сая ам.долларын бүтээгдэхүүн экспортолж, 17,4 сая ам.долларын бүтээгдэхүүн экспортолжээ. Хоёр улс олон улсын тавцанд амжилттай хамтран ажиллаж буйг сайд нар дурдав.
Мөн Гадаад харилцааны сайд Г.Занданшатар БНАСАУ-ын Элчин сайд Ли Чоль Гван-ыг Итгэмжлэх жуух бичгээ барьсантай нь холбогдуулж, хүлээн авч уулзлаа. Г.Занданшатар БНАСАУ нь Монгол улсын тусгаар тогтнолыг хүлээн зөвшөөрсөн хоёр дахь орон болохыг дурьдаад, Итгэмжлэх жуух бичгээ барьж, үүрэгт ажилдаа орсонд нь баяр хүргэлээ.

Зургийн тайлбар: БНФУ-аас Монгол Улсад суугаа Онц бөгөөд Бүрэн эрхт Элчин сайд Жан-Поль Дюмонтой уулзаж байгаа нь

2009.11.25

Гадаад харилцааны сайд Г.ЗАНДАНШАТАР: Гадаад харилцааг эдийн засагжуулах хөтөлбөр эрчимжлээ

Гадаад харилцааны сайдаар томилогдоод удаагүй байгаа УИХ-ын гишүүн Г.Занданшатар Гадаадын хөрөнгө оруулалтын газарт зочилоо.
Тэрээр сайд болсноосоо хойш анхны ажлаа ийнхүү Гадаадын хөрөнгө оруулалтын газраас эхэлж буй нь учиртай аж. Сайд гадаад харилцааг эдийн засагжуулах зорилтынхoo хүрээнд гадаад худалдааг өргөжүүлж, экспортыг дэмжсэн гадаад бодлогыг эрчимтэй хөгжүүлэх эхний чухал алхмаа хийж буй нь энэ юм. Тиймээс гадаад дотоодын биенес эрхлэгчдийг холбож, хөрөнгө оруулалтыг дэмжих зорилготой тус газрын бодлого хөтөлбөрийн хэрэгжилт хэрхэн явагдаж байгааг сайд сонирхож, шинээр хэрэгжүүлэх ажлынхаа талаар ярилцлаа.
Гадаад харилцааг эдийн засагжуулах бодлогыг үндсэн чиглэл болгон ажиллахаа сайд хамгийн түрүүнд хэлж байв.
Мөн Гадаадын хөрөнгө оруулалтын газар нь дэлхийн улс орнуудад Монгол улсаа сурталчлан таниулах, ингэснээр тэдгээрийн хөрөнгө оруулалтыг өөрийн орондоо татан оруулах, үүний тулд хөрөнгө оруулалтын орчныг сайжруулахад бүхий л талаар санаачилгатай ажиллах учиртайг санууллаа.
Тухайлбал энэ хүрээнд гадаадын хөрөнгө оруулалтыг татахуйц томоохон уулзалтуудыг зохион байгуулж, хүнд аж үйлдвэр, уул уурхайгаас гадна оюун ухаанд тулгуурласан бүтээгдэхүүнийг эх орондоо үйлдвэрлэх чухлыг тэрбээр онцолсон. Мөн дэлхийн томоохон компанийн салбарыг Монголд нээх, төр, хувийн хэвшлийн хамтын ажиллагааг сурталчлах, гадаад харилцааны чиглэлээр эрхэлж болох бизнесийн саналуудыг бүрдүүлэхийг сайд үүрэг болголоо.
Түүнчлэн гадаадын хөрөнгө оруулалтыг дэмжих замаар нэг хүнд ногдох ДНБ-ийг нэмэгдүүлж, экспортоо дэмжих боломжтой байгааг дурдсан юм. Сайд Г.Занданшатар энэ талаар хэлэхдээ “Манай улс гадаадад ашигт малтмал, хөдөө аж ахуйн түүхий эд гаргах төдий байна. Цаашид хөдөө аж ахуйн бүтээгдэхүүнийг сурталчлах хэрэгтэй. Манай улсын мал аж ахуйн салбар эрчимтэй хөгжиж байгаа ч малчдын амжиргаанд өөрчлөлт гарахгүй байгаа нь малын үнэ өсөхгүй байгаатай холбоотой юм. Монгол Улсын малын тоо 57 саяд хүрч байна. Үүнээс долоон сая толгой малыг экспортлоход нэг тэрбум ам.долларын ашиг олох тооцоо байгаа. Малын ноос, арьс шир, ноолуурыг экспортлох чиглэлд тэргүүлэх ач холбогдол өгөх ёстой” гэж байлаа.
Мөн Гадаадын хөрөнгө оруулалтаар хэрэгжүүлэх төслүүдийн тухай мэдээллийг англи, орос, хятад, япон, солонгос хэл дээр гаргах, вэб хуудсанд байрлуулах хэрэгтэй байна. Ингэснээр гадаадын хөрөнгө оруулалтыг татах, санхүүжилт хэрэгтэй байгаа чухал төслүүдэд түнш олох боломж нь илүү нээгдэнэ гэдгийг зөвлөлөө. 2010 оныг Гадаад харилцааг эдийн засагжуулах жил болгон их ажил хийх хэрэгтэй байгаа тул хэрхэн ямар хөтөлбөр, төлөвлөгөөгөөр ажиллахаа ойрын хугацаанд танилцуулахыг Гадаадын хөрөнгө оруулалтын газрын дарга Б.Ганзоригт даалгалаа.
“Өглөөний сонин” 2009.11.23